大家睇咗新一集嘅《毛記演偽人協會》未？其實我對畫畫一竅不通，不過想借呢個機會，分享一個關於「馬死落地畫醜漫」嘅故事。
首先，相信認識我嘅人都知我嘅志願係成為作家，然而生活逼人，當時無經驗，搵咗好耐編輯冇人請，好彩最後成報馬經版嘅賢哥請咗我。
解決咗生計問題，我又開始發作家夢。最初搞咗個叫榮泰星嘅Page寫文，可惜無論點寫都得幾個Like，仲有一個係我自己Like嘅。（我承認我非常在意人哋有冇Like架！！！）
為咗提升讀者數量，我開始研究其他人Facebook點樣出文，而其中兩個發現係︰一、多Like嘅文通常偏向地道；二、有一張相。
搵相很難，馬死落地行，明明唔識畫畫嘅我，都膽粗粗洗5百幾蚊買塊電子畫板，喺電腦試下畫。
我唔係唔知自己畫得差，但我相信做乜都有第一次，做唔好，咪下次做好啲囉，而唔係完全唔接受挑戰就放棄！
講真，我初初用唔慣電子筆，直線都畫唔到，本來想放棄，但諗到「如果呢一刻『算』，就成世都要『算』。」所以又死死氣去畫，最後雖然畫得唔好，但起碼表達到意思嘅……
BTW，講咁多，都係想叫大家去睇新一集《毛記演偽人協會》，因為我喺片裡面畫畫個樣好認真……聽講認真嘅男人係最有型嘅……
P.s.隨文奉上一張舊作，溫馨提示，有粗口。
Search